Baiona estrea dúas xincanas dixitais a través das cales descubrir os segredos do casco histórico e a historia da vila.
“Os segredos de Baiona”, así se titula a primeira das propostas, que vén de lanzar a concelleria de turismo de Baiona e que ten como fin de descubrir, dunha forma divertida, todos os detalles do histórico momento da Arribada.
A outra, “O peregrino perdido” invita a veciños e visitantes a coñecer os atractivos e segredos que agocha o casco histórico da vila como parte fundamental do Camiño Portugués da Costa.
«Son dúas novedosas propostas de scape room ao aire libre e móvil en man, orientadas tanto a familias como a público en xeral, para descubrir Baiona dende unha perspectiva máis lúdica», comentaba a concelleira de turismo, Sheila González.
Para comezar o xogo, cada xogador deberá abrir a web disponible nas redes sociais e na oficina de turismo a través do QR e situarse no punto de partida, o Pozo da Aguada. De seguido, en calquera das dúas modalidades, o participante deberá seguir as instrucións e contestar ás preguntas realizadas ata resolver o mistorio.
“Os turistas non son o único público obxectivo desta actividade” asegura a edil de turismo. “Tamén queremos que participe a poboación local e os visitantes do entorno. Todos poden pasar un rato divertido en Baiona”.
