O Concello de Allariz, a través da súa área de Benestar Social, presenta a programación das XXI Xornadas para a Igualdade 2025, que se celebrarán con motivo do Día Internacional da Muller baixo o lema «Allariz Camiña pola Igualdade, e ti?». O evento foi presentado oficialmente hoxe pola alcaldesa de Allariz, Cristina Cid, acompañada pola concelleira de Benestar Social, Tania Álvarez, e pola técnica en Igualdade, Cristina Outeiriño. Esta iniciativa reafirma o compromiso municipal coa igualdade de xénero, promovendo a importancia de avanzar colectivamente cara a unha sociedade máis xusta. Ademais, o lema desta edición invita á reflexión sobre a responsabilidade individual e colectiva neste camiño, fomentando a conciencia social e incentivando á cidadanía a formar parte activa do movemento polos dereitos das mulleres.
O programa inclúe diversas actividades que buscan sensibilizar, educar e fomentar o debate sobre a igualdade. O acto inaugural será o venres 7 de marzo, cun Manifesto pola Igualdade na Praza Maior ás 12:00 horas, seguido pola tarde coa charla «A Revolución Amorosa», impartida pola escritora e investigadora Coral Herrera, no Fogar dos Maiores ás 19:00 horas.
O sábado 8 de marzo, ás 17:00 horas, terá lugar o espectáculo musical «Soñando Inventei» na Casa da Cultura, unha proposta destinada a público familiar e aberta ata completar capacidade.
O venres 14 de marzo, a mocidade terá a oportunidade de participar no Escape Room «Misión Igualdade», unha actividade dirixida a adolescentes de 12 a 18 anos que se celebrará na Casa da Mocidade ás 18:00 horas. A inscrición será previa e poderá realizarse ata o 12 de marzo a través do correo mocidade@allariz.gal (capacidade limitada a 30 persoas).
O evento pecharase o domingo 16 de marzo coa Andaina/Carreira pola Igualdade, que sairá da Praza Maior ás 11:30 horas. A participación é gratuíta e poderá formalizarse ata o 28 de febreiro ás 12:00 horas enviando un correo a igualdade@allariz.gal ou chamando ao 988 55 40 59. As persoas participantes indicarán o seu nome, número de contacto e a súa talla de camiseta no momento da inscrición xa que recibirán unha camiseta conmemorativa das xornadas o día da Andaina/Carreira. A xornada finalizará cun concerto de Soul&Roll ás 13:00 horas, tamén na Praza Maior.
