O Concello de Ourense anunciou que a celebración do Entroido será do 27 de febreiro ao 5 de marzo. Unha das principais citas do seu ciclo festivo consolidado como “as festas por excelencia da cidade” e o “mellor carnaval da metade Norte de España”, segundo asegurou o alcalde, Gonzalo Pérez Jácome. O rexedor presentou a programación de actividades nun acto na Sala Valente, xunto á concelleira de Artes e Festexos, Noa Rouco, e representantes dos entroidos da Pita, As Eiroás, Frei Canedo, A Ponte, e Paquita e Nicanor, Seixalbo.
Gonzalo Jácome animou ao público a participar na festa. Tamén, o alcalde sinalou que “cada ano vai a máis” e fai que Ourense “compita sen lugar a dúbidas cos carnavais de Canarias ou Cádiz”. Serán sete días de festa con animación de rúa cun “despregue de charangas nunca visto nun entroido”, e actuacións de grupos musicais, orquestras e varios DJ “top”.
O alcalde estivo acompañado por representantes dos Entroidos da Pita, As Eiroás, Frei Canedo, A Ponte, e Paquita e Nicanor, Seixalbo. Eles avanzaron as súas respectivas actividades para este Entroido, nas que colabora o Concello de Ourense. Ademais, o alcalde destacou o traballo que realizan os colectivos organizadores destas festas, ás que o concello vén dando “un novo impulso” durante os últimos anos e achega gran parte do seu financiamento.
A programación
A programación de actividades organizadas polo Concello iniciase e péchase coa exposición fotográfica de Personaxes do Entroido galego e portugués. Conta con 146 instantáneas de Carlos Padín que se acollen na Sala Valente desde o mércores 12 de febreiro até o día 16 de marzo.
Entre as diversas actividades actuará Dj Pancho e Alex Martini con máis artistas e agrupacións no Xoves de Comadres. Así mesmo, haberá actividades infantís como o desfile escolar o venres 28, ou o multitudinario desfile de comparsas que sairá o domingo 2 de marzo ás 16.30 horas das Lagoas. O percorrido do desfile irá por Curros Enríquez, Xoán XXIII e Progreso. Ese mesmo día actuará Ráfaga ás 20:30 horas na rúa do Progreso.
Ademais, realizarase o reparto de orellas, 12.000 unidades, e bica o martes 4 de marzo. Finalmente, o mércores 5 ás 20:00 horas haberá o tradicional Enterro da Sardiña amenizado polas charangas Felga e Bandiños. O percorrido deste avanzará desde a Praza Maior até o Parque de San Lázaro.
As persoas interesadas poden consultar todas as actividades na programación do Entroido 2025 que se atopa na páxina web do Concello de Ourense.
