A asociación Covelo Natural e o piloto Pablo Castro premiados na X edición dos galardóns “Síntete Covelo”

O Concello de Covelo entregou os seus recoñecementos da décima edición dos “Galardóns Síntete Covelo” á asociación Covelo Natural e ao piloto de rallys Pablo Casto. Un acto no que non faltou a música e a presenza das e dos veciños que cada ano se achegan ao auditorio municipal para arroupar ás persoas galardoadas.

A Asociación Covelo Natural recibiu o seu galardón, segundo trasladou a concelleira Lourdes Enes, “polos 30 anos adicados á divulgación e promoción do Concello de Covelo a través da micoloxía, gastronomía, apicultura, fotografía, bioloxía e difusión de coñecementos e posta en valor do patrimonio medio ambiental a través de diferentes actividades no colexio de Covelo, sempre coa finalidade de ensinar e protexer o emblema do concello de Covelo e a sua natureza” destacou a concelleira.

Ademais, o xurado formado pola concelleira do BNG, Belén Carballo; José Fdez Muradás, concelleiro do PSOE e Lourdes Enes, concelleira do PP, entregou o seu recoñecemento ao piloto de rallys Pablo Castro “quen leva o nome de Covelo ao longo da súa traxectoria profesional e persoal. A nivel laboral tivo en conta o nome do seu barrio «Coveliño» para pórlle nome á súa empresa. A nivel persoal, adícase ó mundo da competición nacional e internacional do rally. Aínda que reside en Alcalá de Henares, Madrid, dende fai décadas, sempre quere recordar de onde vén nomeando o noso pobo alí onde vai. Incluso serigrafiando o seu coche de competición co lema «Disfruta do natural-Concello de Covelo» e sempre reserva tempo para vir coa súa familia e compartir o valor do pobo, do rural, da natureza e da convivencia nas rúas e festividades locais” explicou o xurado.

Ao remate da entrega de galardóns, o público asistente puido fotografiarse cos premiados e compartir un petisco despois do concerto de “Sin Reserva Acústico”. A concelleira, Lourdes Enes, e o alcalde de Covelo, Pablo Castillo, manifestaron a súa emoción neste acto que distingue o amor pola súa vila e a dedicación de moitas e moitos dos seus veciños en conservar o seu rico patrimonio histórico e medio ambiental e a súa posta en valor. “Como alcalde é sempre moi emocionante estar aquí destacando ás persoas que levan o nome de Covelo co orgullo, que valoran a nosa riqueza e que portan con cariño o nome da súa orixe ou do lugar que elixiron para vivir. Como goberno seguiremos traballando para mellorar o día a día de todas e de todos abertos sempre a escoitalos e apoialos” sinalou o gobernador local.