A alcaldesa de Mos, Nidia Arévalo, e a concelleira de Cultura mosense, Sara Cebreiro, convidaron a participar no gran domingo de Nadal. A localidade mosense celebrará esta actividade o vindeiro 22 de decembro, con papanoelada moteira en sesión matinal, e o tradicional Certame de Rondallas en horario vespertino.
Ás 10.30 horas dará saída a papanoelada moteira, con avituallamento gratis para os participantes e caramelos para a cativada, da Avenida de Puxeiros. Rematará no mesmo lugar cunha actividade para familias a cargo de Barafunda Animación: Globotolo, ás 12.30 horas. Ademais, ás 17.00 horas terá lugar o Certame de Rondallas no Pazo de Mos.
No tradicional certame rondalleiro mosense participarán un total de oito agrupacións correspondentes a catro de Mos, tres de Porriño e unha de Tui. As de Mos son a Rondalla de Guizán, Rondalla de Herville, Rondalla de Torroso e Rondalla de Santa Eulalia de Mos. As de Porriño son a Rondalla de Santa María de O Porriño, Rondalla de Pontellas e Rondalla de Atios. Por último, a tudense é a Rondalla Pexegueiro de Tui.
A rexedora local mosense, Nidia Arévalo, destacou neste senso “a importancia da tradición rondalleira no sur da provincia de Pontevedra en xeral e no municipio de Mos en particular. De ahí que sexa vital coidala, preservala, protexela e fomentala”, declarou. E salientou “o papel dos rondalleiros e rondalleiras. Traballan todo o ano para dar o mellor de sí nestas datas e incluso deixan a súa vida persoal e aos seus seres queridos nun segundo plano para alegrarnos a todos as festas”. Agradeceu “o seu labor, o seu bo facer, e que enchan de ledicia, espectáculo e boa música cada Nadal en Mos”.
