O Festival de Cans, que celebrará a súa XXII edición do 20 ao 24 de maio de 2025, abre o prazo de inscrición de obras para a súa competición oficial. Entre as novidades desta competición estará o aumento da dotación económica en varios dos premios, que chegarán ata preto dos 13.000 euros.
Os autores e autoras que desexen participar no festival poderán inscribir, de xeito gratuíto, as súas curtametraxes, videoclips, webseries e mesmo longametraxes inéditas na plataforma gratuíta habilitada na web do Festival de Cans.
Segundo informa a organización do Festival «darase prioridade ás obras que sexan estreas absolutas, mais pode inscribirse calquer tipo de obra recente producida entre os anos 2024 e 2025″.
Os premios máis relevantes da competición serán o Premio do Xurado á Mellor Curta de Ficción, dotado con 2.000 euros, o Premio á Mellor Curta de Animación, dotado con 1.800 euros, e os Premios do Público ou Furacáns, dotados con 1.500 euros cada un. Ademais, haberá outro premio de 1.000 euros na categoría de Novas Camadas, destinada a creadores de ata 25 anos.
A convocatoria admite tamén a inscrición de obras que non estean aínda completamente finalizadas, en fase de postrpodución ou montaxe, na data límite de inscrición, o día 2 de marzo.
