Gran acollida dos obradoiros de Nadal da Biblioteca Municipal de Tui que nun so día cubriron as 150 prazas ofertadas. Celebraranse o luns 23, xoves, 26, e venres 27 de decembro, e o xoves 2 e venres 3 de xaneiro en horario matinal. Será baixo o título xenérico “Un Nadal diferentes de cor verde” e facilitará a conciliación da vida familiar e laboral durante as vacacións de Nadal ao tempo que favorece a creatividade dos máis pequenos da casa.
Os nenos e nenas inscritos, con idades entre os 5 e os 12 anos, coñecerán a figura do Grinch a través dos obradoiro previstos coas súas travesuras, contos e lendas, realizarán un scape room, xogarán con este verde personaxe e vivirán a maxia do Nadal.
A concelleira de Ensino, Cultura e Mocidade, Sonsoles Vicente Solla, destaca a “excelente acollida desta oferta de actividades que promove a Biblioteca Municipal para os máis pequenos”, incidindo en que “este non é só un espazo de información, lectura e préstamo de libros, senón que por medio deste tipo de ofertas ábrese a todos os sectores da cidadanía consolidándose como centro cultural”.
