Esta mañá celebrouse no salón de sesións do Concello de Mos a mesa de negociación cos sindicatos que contan con representación na administración local mosense. Estes son CSIF, CIG e CCOO e na reunión participaron, ademáis dos representantes de cada un deles, a alcaldesa, Nidia Arévalo e o concelleiro de Persoal, Leo Costas. Tamén estiveron presentes o secretario municipal, Carlos Piñeiro, e a técnico de Persoal, Tatiana Iglesias.
Durante a xuntanza procedeuse á negociación da Oferta de Emprego Público, sobre a que se tratou a súa futura publicación. Ademais, abordouse tamén unha modificación puntual da RPT (Relación de Postos de Traballo) municipal.
Para continuar afondando neste segundo punto fixouse xa unha nova reunión, a celebrar o vindeiro día 17 de decembro. Durante esta próxima xuntanza, segundo informaron os representantes municipais Arévalo e Costas, “comezarase xa a traballar no documento, tendo en conta tanto as aportacións dos sindicatos como as indicacións técnicas propias do departamento municipal de Persoal”.
A alcaldesa mosense, Nidia Arévalo, declarou a este respecto estar “orgullosa de rematar así este ano 2024, tratando a mellora da RPT, xa que este documento é fundamental para a administración local e esta revisión optimizará o seu funcionamento”. Iníciase así o traballo necesario para a redacción deste novo documento actualizado e mellorado. Así mesmo, implicará labores de optimización que cómpre realizar, xa que o documento anterior ten xa unha vixencia de seis anos.
