A Universidade de Vigo aprobou este luns en Consello de Goberno a verificación de preto dunha ducia de novos títulos, incluíndo un novo grao, tres dobres titulacións e sete mestrados. Quedan aínda por diante numerosos trámites, pero, se todo sae segundo o agardado, serán as grandes novidades da oferta académica da institución para os cursos 2025/2026, no caso de dúas dobres titulacións vinculadas á Facultade de Ciencias, e 2026/2027 para o resto. Así se expuxo durante o Consello, celebrado como é habitual na sala Manolo Ramos do edificio Ernestina Otero, nunha sesión na que tamén se deu visto e prace a numerosos cambios de normativas relacionadas coa contratación de profesorado, á Memoria de Responsabilidade Social da UVigo correspondente ao 2023 e ao Regulamento de Réxime Interno do Instituto Universitario de Investigación Xustiza e Xénero, entre outros temas.
Novos títulos nos tres campus
Polo que respecta ás novas titulacións, haberá novidades nos tres campus. No caso de Pontevedra porase en marcha no curso 2026/2027 o Grao en Enxeñaría de Tecnoloxías Navais para a Defensa, titulación que estará adscrita ao Centro Universitario da Defensa de Marín e que substituirá o actual Grao en Enxeñaría Mecánica. Por outra banda, aprobouse tamén a posta en marcha do que será o primeiro PCEO -Programación Conxunta en Estudos Oficiais-, ‘dobre-grao’, do campus, e que, neste caso, unirá as titulacións de Comunicación Audiovisual e Publicidade, impartidas na Facultade de Comunicación. A maiores, tamén se porá en marcha un novo máster, vinculado neste caso á Escola de Enxeñaría Forestal, bautizado como Máster en Solucións Innovadoras en Geomática que, tal e como explicou o vicerreitor de Titulacións e Innovación Docente, Alfonso Lago, “ten pensado establecer unha dobre titulación coa Universidade Vilnius Tech, de Lituania, incluída no consorcio Athena”.
No campus de Ourense, as novidades serán dous novos PCEO, neste caso vinculados ambos os dous á Facultade de Ciencias: PCEO en Enxeñaría Agraria e Ciencias Ambientais e PCEO en Enxeñaría Agraria e Ciencia e Tecnoloxía dos Alimentos. A idea é que poidan ofertarse xa o vindeiro curso, 2025/2026, “polo que, se o centro está disposto, intentaremos que a consellería o aprobe para esa data”, para o que sería necesario aprobalo xa nas vindeiras semanas -Consello de Goberno de finais de xaneiro-, explicou o vicerreitor. En canto á oferta de mestrados para este campus, aprobouse a verificación de tres novos títulos: Máster en Viticultura e Enoloxía, na Facultade de Ciencias; Máster en Políticas de Seguridade e Sistema Penal, en Dereito, e Máster en Traballo Social no ámbito sanitario, “titulación que se está a implantar en todo o Estado mediante a colaboración de diferentes universidades por zonas xeográficas.
En relación ao campus de Vigo todas as novidades chegan da man dos mestrados e, máis concretamente, dos vinculados á Facultade de Química e á Escola de Enxeñería Industrial. En relación a Química, aprobouse a verificación do Máster en Ciencia e Tecnoloxía en Nanomateriais e Biomedicina que vén a substituir o antiguo Máster en Nanociencia e Nanomedicina e o Máster en Química Teórica e Modelización Computacional que presenta unha nova proposta para substituir o máster antiguo. No caso de Enxeñería Industrial porase en marcha o Máster en Deseño e Fabricación na Industria Conectada e Intelixente, que substituirá ao Máster en Industria 4.0 -cuxa extinción se aprobou tamén nesta sesión do Consello- e o Máster en Vehículos Autónomos, proposta vinculada ao catálogo G2030.
