A Sala Félix Rodríguez, no edificio Francisco Sánchez, acolle este mércores e xoves, de 16.30 a 18.30 horas, unha sesión formativa sobre Alzheimer e outras demencias. Esta actividade está organizada por FADEAL (Federación Atlántica de Asociacións de Familiares de Persoas con Alzheimer e outras Demencias). Ademais, conta co financiamento da Deputación de Pontevedra e colaboración do Concello de Tui.
A sesión formativa será impartida por AFAGA Alzheimer e vai dirixida principalmente a coidadores de persoas cunha demencia neurodexenerativa. Tamén está enfocada a persoas diagnosticadas en fase moi temperá, así como a calquera persoa interesada na temática.
As demencias teñen unha alta prevalencia xa que aproximadamente afectan ao 31,25% das persoas que superan os 85 anos. Estes casos destacan especialmente en Galicia, cunha poboación altamente envellecida. Ademais, o contexto rural experimenta un fenómeno de sobre envellecemento ao que se lle engade unha escaseza de servizos e ausencia de intervencións. Esta realidade non só afecta á persoa que padece a enfermidade, senón tamén a todo o núcleo familiar.
Por este motivo ponse a disposición das persoas afectadas esta formación gratuíta, que será impartida por unha psicóloga e unha traballadora social especializadas na temática. O obxectivo é formar, orientar e axudar a persoas que se atopen nesta situación. Así mesmo, achegar coñecementos e recursos para poder afrontar mellor a enfermidade e mellorar a calidade de vida da persoa con demencia e da súa familia.
