Os socialistas de Ponteareas propoñen cambiar de localización as instalacións deportivas da Freixa co obxectivo de «garantir a seguridade dos usuarios e das usuarias». Así o aseguran nun comunicado no que apuntan que «trasladamos ao goberno municipal a necesidade de que «é fundamental que as nosas instalacións deportivas estean situadas en lugares seguros para evitar riscos innecesarios posto que a zona da Freixa está identificada como unha área inundable».
Deste xeito, a voceira socialista en Ponteareas, Vanesa Fernández, indica que «o pasado día 17 de novembro lemos na prensa que o goberno local ten a intención de ampliar as instalacións deportivas no noso concello con novos equipamentos». Neste contexto, Fernández apunta que «trasladaremos ao goberno municipal a necesidade de que esta nova localización das instalacións deportivas da Freixa» e propoñen realizar un estudo técnico para identificar unha nova localización «axeitada e segura».
No comunicado, o PSOE de Ponteareas comprométese a «traballar en colaboración co goberno municipal para conseguir a implicación e o apoio económico de todas as administracións para conseguir facer realidade esta necesidade«.
A voceira socialista, Vanesa Fernández, engadiu que «o noso obxectivo é garantir que a cidadanía poida gozar de instalacións deportivas de calidade e seguras, así como deixar de gastar milleiros de euros todos os anos en reparacións».
O PSdeG-PSOE de Ponteareas espera do goberno municipal «altura política» e o apoio das restantes forzas políticas para levar a cabo esta importante iniciativa e asegurar un futuro sen perigo para as persoas e para as instalacións deportivas da localidade».
