A Audiencia Provincial de Ourense condenou, como autor responsable dun delito de homicidio por comisión por omisión do artigo 138, en relación co artigo 11 do Código Penal, a 10 anos de prisión ao acusado de matar, en xaneiro de 2020 na localidade de Barbadás, á súa parella, cuxo corpo foi localizado oito meses despois no leito dun río. O Tribunal Superior de Xustiza de Galicia (TSXG) declarou o pasado mes de xuño nula a primeira sentenza emitida pola Audiencia Provincial, por alcanzar “unha conclusión diferente á emitida polos xurados, que atenderan a tese acusatoria”, polo que ordenou retrotraer as actuacións ao momento anterior a ditarse a resolución, a fin de que se ditase outra, de conformidade co veredicto de culpabilidade emitido polo xurado, que entendeu que o falecemento da vítima se produciu pola omisión de auxilio do investigado.
Na resolución, o maxistrado presidente do Tribunal do Xurado indica que o acusado, tal e como se considerou probado na acta do veredicto, “se atopaba presente no momento no que se produciu o traumatismo cranioencefálico vertebral da vítima e non lle prestou a asistencia necesaria para evitar o seu falecemento”.
Desta forma, entendeu acreditado que o falecemento da muller, que tiña 26 anos, “foi provocado pola falta de asistencia que debeu prestarlle a súa parella despois de producirse a súa caída nun punto non determinado”. O xurado asume, desta forma, a tese sostida polos médicos forenses de que as lesións que presentaba a vítima foron consecuencia dunha caída por precipitación, que entenden predominantemente accidental. A sentenza non é firme, pois contra ela cabe presentar recurso de apelación ante o TSXG.
