As estradas galegas enchéronse dende a tarde de onte de árbores e ramas debido ás fortes rachas de vento e as intensas choivas que chegaron á comunidade galega tras o paso do temporal Kirk por Galicia.
O Centro Integrado de Atención ás Emerxencias 112 Galicia rexistrou, entre as últimas horas do día de onte e as primeiras de hoxe, un total de 371 incidencias, segundo a última actualización.
A maior parte das incidencias veñen provocadas por caídas de árbores e ramas ás estradas que entorpecen o paso, así como a caída de obxectos e tamén as accións doutros grupos de emerxencias para evitar riscos, como caídas de postes de luz ou teléfono en risco de desprendemento.
O servizo de emerxencia destacou tamén as intervencións relacionadas con derrubes de estruturas, como en concreto en Porto do Son e Santiago de Compostela, onde «caíron unha parede dun pavillón polideportivo dun centro educativo e a cuberta do conservatorio de música, respectivamente», informan dende o 112.
As provincias que soportaron un maior número de intervencións foron: Pontevedra e Coruña, con 216 e 104 respectivamente. A moita menor escala, as provincias de Ourense e Lugo, que rexistraron polo de agora 30 e 21, respectivamente.
Os concellos que destacaron por número de incidencias foron: Vigo, Pontevedra, Marín, Ponteareas, Santiago de Compostela, Padrón, Ribeira e Rianxo.
As autoridades alertan que o episodio adverso continúa, aínda que en menor medida, polo que convén manter as medidas de autoprotección como evitar desprazamentos na medida do posible ou optar por outras opcións de transporte.
