O Concello de Porriño iniciou xa os traballos de construción dun novo parque infantil na parroquia de Budiño. Este proxecto forma parte dunha serie de iniciativas destinadas a crear e mellorar zonas públicas de xogo para a cativada en todo o municipio. Este novo espazo responde á necesidade de áreas infantís na zona, e situarase nunha parcela próxima ao polígono industrial no barrio Vaquería. Nesta zona actualmente non hai parques cercanos para os máis pequenos.
O concelleiro de Parques Infantís, Marcos Martínez, explicou que o novo parque “ten unha superficie de máis de 150 metros cadrados e contará cunha variedade de elementos de xogo. Estes están deseñados para fomentar a diversión e a seguridade dos nenos. Entre as instalacións incluiranse dous balancíns individuais, un multixogo e un bambán.” Para garantir a seguridade dos usuarios, as obras comezaron co movemento de terras necesario para a instalación dunha malla geotextil perimetrada en formigón. Sobre esta malla estenderase unha grosa capa de area.
Este proxecto representa un investimento de 15.000 euros. Dentro desta cuantía, o 70% está financiado grazas a unha subvención autonómica destinada á creación e mellora de infraestruturas e equipamentos. “Seguimos comprometidos co benestar dos máis pequenos e a creación de espazos de calidade onde poidan socializar e xogar”, concluíu o alcalde, Alejandro Lorenzo “Queremos que O Porriño sexa un lugar onde todos os nenos poidan crecer felices e activos”.
