O Concello organiza para este sábado e domingo travesías guiadas que percorrerán as dúas etapas da Vía Mariana Luso Galaica ao seu paso por Covelo. Esta actividade está no marco da oferta estable de actividades turístico-deportivas do Concello de Covelo e da Deputación de Pontevedra. O percorrido ten como finalidade promover a riqueza medioambiental e patrimonial do municipio, que agasalla aos e ás camiñantes recunchos inéditos e vistas únicas.
As persoas participantes camiñarán guiadas polo guía de montaña, fotógrafo e biólogo, Julio Eiroa. O número de prazas é limitado cun máximo de vinte persoas por día. As persoas que desexen inscribirse ou ter máis información deben contactar co guía local no número teléfono 654.500.652.
O sábado percorrerán a etapa 7 da Vía Mariana Luso Galaica. O punto de encontro será o alto da coroación na Franqueira, A Cañiza, para dirixirse ao centro de Covelo. Trátase dun percorrido lineal de nove quilómetros de dificultade baixa para relizar en aproximadamente tres horas e media. A hora de saída será ás nove da mañá. O domingo o roteiro correspóndese coa etapa 8 da Vía Mariana e comeza na praza de Covelo para ir ata a Portela do Foxo, entre os concellos de Covelo e Fornelos de Montes. Será unha travesía de dificultade moderada con 23 quilómetros e unha duración aproximada de nove horas.
Para esta actividade de balde recoméndase levar roupa e calzado axeitado para camiñar, protección solar, bebida e alimentos reconstituíntes para tomar durante o camiño. Tamén é recomendable levar bastón de sendeirismo. Existe a posibilidade de inscribirse só a unha das etapas. Haberá un minibús de recollida ao final da etapa 8 con retorno a Covelo.
