O Tribunal Superior de Xustiza de Galicia (TSXG) acolleu hoxe a Apertura do Ano Xudicial 2024-2025 na comunidade autónoma. Ao acto, presidido polo presidente do alto tribunal galego, José María Gómez y Díaz-Castroverde, asistiron os membros da Sala de Goberno, o fiscal superior de Galicia, Fernando Suanzes, e o vogal do Consello Xeral do Poder Xudicial (CGPJ) José Luis Costa Pillado, entre outras autoridades civís e militares.
Díaz-Castroverde demandou a creación de novas unidades xudiciais en Galicia, pois indicou que desde 2020 “soamente outorgáronnos catro novas prazas de maxistrado/a en órganos colexiados e oito novos xulgados”, fronte aos 18 solicitados. O presidente do TSXG asegurou que a situación da Xustiza en Galicia “non presenta o estado que nos gustaría”, debido, principalmente, “ás consecuencias da folga que vivimos a principios de 2023 e ao aumento de asuntos que se produciu en todas as ordes xurisdicionais, especialmente na civil”. Así, sinalou que en 2023 recibíronse case un 5 % máis de casos que en 2022 e que a xurisdición civil foi a que rexistrou un maior incremento no ingreso de asuntos, un 7,6 %.
O presidente tamén solicitou a implantación das gardas de 24 horas na Coruña e Vigo e reclamou melloras nalgúns dos edificios xudiciais, entre eles os de Muros, Padrón e Vilagarcía de Arousa. Por outra banda, recalcou a importancia de que o Imelga continúe traballando na redución dos tempos de emisión dos informes psicosociais e apuntou que é imprescindible «persistir nas liñas de reforzo de persoal funcionario, en coherencia cos reforzos de persoal xudicial, ou alí onde son esenciais, como Carballo, Betanzos, Negreira ou, de novo, Vilagarcía”.
