Será ás 19.30h na Sala Municipal dentro da programación do Setembro Xudeu
Este venres, 6 de setembro, terá lugar unha nova actividade do programa do “Setembro xudeu en Tui” que consiste nunha conferencia sobre “El mundo judío comunicado a través del arte” a cargo de Israel Doncel, director de comunicación de Centro Sefarad-Isarel. Será ás 19.30 h na Sala Municipal.
O alcance e a capacidade de transmisión da pintura convertérona durante varios séculos na principal ferramenta de comunicación por parte dos poderes políticos, sociais e relixiosos. O mundo xudeu sufriu na nosa península diferentes campañas que buscaban desacreditar a súa imaxe fronte ao resto da sociedade con propósitos antisemitas e antixudeus, especialmente nos tempos previos e posteriores ao edicto de expulsión dos Reis Católicos.
Aínda que tamén atoparon algúns reflexos que trataban de ofrecer un apoio velado a unha cultura inseparable da historia do noso país. Se como sinala Jean Caune «o exame do fenómeno de comunicación que se desenvolve a partir da práctica artística, déixanos dúas preguntas: a primeira é acerca da influencia da arte na vida colectiva, e a segunda sobre a arte como forma expresiva determinada pola sociedade». Na conferencia deste venres Israel Doncel porá o foco nas estratexias de comunicación, a súa plasmación e as narrativas dos séculos XIV-XVI utilizadas en torno ao mundo xudeu na pintura.
Israel Doncel é xornalista especializado en comunicación corporativa e ten traballado en diferentes departamentos de comunicación de institucións de ámbito internacional como Casa América e, na actualidade, no Centro Sefarad-Israel onde desempeña a dirección de comunicación.
O Centro Sefarad-Israel é unha institución de diplomacia pública formada polo Ministerio de Asuntos Exteriores, Unión Europea e Cooperación, a Comunidad de Madrid e o Municipio de Madrid cuxo propósito é servir de ponte entre España e o mundo xudeu. Desde a súa creación, no ano 2006, o Centro Sefarad-Israel ven afondando no estudo do legado da cultura sefardí como parte integrante e viva da cultura española, fomentando un maior coñecemento da cultura xudía na sociedade española, divulgando e lembrando a memoria das vítimas do Holocausto e impulsando o desenvolvemento dos vínculos de amizade e de cooperación entre a sociedade española e a sociedade israelí a través do mutuo coñecemento.
A concelleira de Turismo e Patrimonio Ana María Núñez Álvarez destaca que esta conferencia é unha cita ineludible para achegarse a un coñecemento máis amplo da ampla pegada que as comunidades xudías teñen deixado na cultura española e recollidas nas diversas visións, positivas unhas e negativas outras, que nos ofrece a arte española a través dos séculos. Todo presentado dende unha visión didáctica para achegarse a un público amplo.
Esta conferencia terá lugar na Sala Municipal de Exposicións, no Edificio “Francisco Sánchez”, este venres 6 de setembro ás 19.30 horas e forma parte do amplo programa de actividades que desenvólvense en Tui arredor da cultura xudía neste mes de setembro.
Tui é a única cidade da provincia de Pontevedra que forma parte da Red de Juderías de España – Caminos de Sefarad e do itinerario cultural do Consello de Europa “Rutas do patrimonio xudeu” que xestiona a The European Association for the Preservation and Promotion of Jewish Culture and Heritage (AEPJ).
