A ‘Árbore dos Desexos’ que no Nadal fixo realidade os desexos dos nenos e nenas das familias ás que axuda SOS Tomiño-Baixo Miño foi plantada neste lugar
Tui conta cun novo parque infantil e área de lecer completamente en Chans do Carrasco en Randufe. Dende hai uns días este novo espazo está xa aberto para o seu disfrute pola poboación.
A actuación realizada supuxo un investimento de case 300 mil euros, e enmárcase na liña de traballo iniciada para mellorar e acondicionar os parques infantís e áreas de lecer no municipio.
O novo parque de Chans conta con diferentes elementos lúdicos, bancadas, novas luminarias e un tótem informativo. Destaca o parque infantil de seguridade vial cun circuíto para a aprendizaxe e disfrute dos máis pequenos e pequenas, e dispón de elementos clásicos de xogos coma randeeiras e tobogáns xunto a elementos máis novidosos de xogos, adaptados a todas as idades e capacidades.
Nesta actuación foron ademais acondicionadas as pistas deportivas, instalados biosaudables, creouse un espazo para bicicletas e unha zona delimitada de aparcamento. A actuación realizada integrouse co palco existente e co lavadoiro de As Chans que foi recentemente restaurado. Ademais esta área conta con zonas verdes. Precisamente nun destes espazos foi plantada a “Árbore dos Desexos”, unha iniciativa que xurdiu de Miguel Veiga, e que no Nadal estivo na praza da Inmaculada para facer realidade os desexos dos nenos e nenas das familias á que axuda SOS Tomiño – Baixo Miño, Precisamente Miguel Veiga amosou a súa satisfación porque esta Árbore dos Desexos poida crecer nun entorno coma o parque de Chans, co que dicía “péchase o círculo desta iniciativa que naceu para axudar a uns nenos que están menos favorecidos para darlles un bonito Nadal, e que agora neste parque os nenos sigan xogando nun parque que representa tanto, o amor, o cariño, a amizade, o querer facer cousas bonitas, e seguir traballando para lograr un mundo mellor”. Avanzaba que comezaron xa as primeiras conversas para dar continuidade á Árbores dos Desexos en cada Nadal en Tui.
Dende SOS Tomiño-Baixo Miño agradeceron esta iniciativa, do mesmo xeito que o fixo o alcalde, Enrique Cabaleiro, salientando que esta idea solidaria conta co respaldo da institución municipal. Quixo tamén o rexedor tudense agradecer o labor solidario que realizan dende SOS Tomiño Baixo Miño.
A actuación realizada no parque de Chan supuxo un investimento de 298.653,69 € do que 287.648,75 € foron financiados con cargo ao Plan Concellos 2022-2023 da Deputación Provincial. A obra foi executada pola empresa Construcciones, Obras Y Viales S.A. COVSA.
