A 51 edición da festa trasládase ao Pazo de Mos e ten como pregoeira á influencer mosense Tamara García
Esta mañá tivo lugar na contorna do Pazo de Mos a Presentación da 51 edición da Festa da Rosa de Mos á que asistiron a alcaldesa do Concello mosense, Nidia Arévalo, Valentín García, Secretario Xeral de Política Lingüística da Xunta de Galicia, Nava Castro, Deputada Provincial, Sara María Cebreiro, Concelleira de Cultura de Mos, Ramón Vilanova, Presidente da Fundación Pazo de Mos, Concelleiros e Concelleiras do goberno local de Mos, representantes da Asociación de Palilleiras de Mos, promotoras da XVI Edición da Xuntanza de Palilleiras de Mos, representantes da Asociación de Hostaleiros de Mos, promotores da III Edición da Festa BARESMOS, representantes da Asociación Mulleres Rurais do Val da Louriña, promotoras da XXV Edición da Exaltación da Empanada de Millo, As Maimiñas, promotoras da VIII Edición do Festival Infantil Canto Conto, representantes do Círculo Cultural Abrente, promotores do VI Festival Abrente Folk, representantes do Club Louro Tameiga, do Club de Patinaxe Blossom e do Club Hípico Alazán.
A principal novidade desta nova edición da festa, tras medio século de historia, é o comezo dunha nova etapa anunciada pola rexedora local mosense, Nidia Arévalo, quen desvelou que este ano a festividade máis emblemática do municipio se celebrará no mesmo lugar no que hoxe tiña lugar a presentación do evento: o Pazo de Mos.
Arévalo explicaba que “iniciamos unha nova etapa tras 50 anos con este novo enclave no Pazo de Mos. Por suposto coa inmensa gratitude que corresponde cara a veciñanza da parroquia de Petelos onde se celebrou ata o de agora, na Praza do Concello”. “Con este cambio de ubicación pretendemos que o festivo día 13 de xuño a festa se poida prolongar durante toda a xornada e poñer en valor a orixe da festa, xa que a historia da rosa de Mos vén do Escudo do Marquesado dos Quirós e os primeiros Marqueses están enterrados na Igrexa de Santa Baia ou Santa Eulalia” detallaba a alcaldesa.
Ademais a primeira Casa Consistorial mosense tamén estivo neste mesmo lugar, e co traslado da celebración optimizaranse recursos nun mesmo espazo coas características óptimas para que a Festa de Interese Turístico de Galicia siga crecendo.
Outras dúas grandes novidades desta nova etapa serán 2 protagonistas de honra que terá a festa deste ano: a pregoeira Tamara García Romero. Mosense da parroquia de Guizán con gran proxección nacional polo seu enorme éxito en medios audiovisuais e redes sociais. De gran carisma e simpatía, leva o nome de Mos e de Guizán, a súa parroquia e da súa familia, alí onde vai. Ademais da súa carreira como creadora de contido viral en redes, Tamara está avalada pola súa experiencia e formación como publicista e deseñadora de moda, o que a convirte nunha muller mosense da que a súa veciñanza se sinte inmensamente orgullosa. A pesares da súa xuventude, é unha muller entregada e traballadora, polo que está a recoller os éxitos que consegue a base do seu esforzo. Inmellorable embaixadora mosense, divertida e grandísima comunicadora.
E as xogadoras da UD Mos Feminino que pasan a ser As Celtas: o nacemento do Celta Feminino que comezará a xogar a vindeira tempada, nace do embrión da Unión Deportiva Mos Feminino e afianza o vínculo entre o clube celeste e a localidade mosense.
Vai de novidades a Festa da Rosa 2024. E outra delas é que o propio Día da Rosa, 13 de xuño e festivo local, -polo cal non hai clase nos colexios de Mos-, o Concello organizará o campamento A Rosiña paralelo e simultáneo cos actos institucionais na contorna do Pazo.
Será gratuíto para as familias e permitirá conciliar a nais e pais durante unha xornada na que a maioría traballa aínda que os seus fillos e fillas non teñan colexio.
E esta non será a única novidade. Haberá máis e moi interesantes que se irán descubrindo durante os vindeiros días. O programa de actividades prolongarase durante todo o mes de xuño, sendo o 13 o día grande: Día da Rosa de Mos.
