Óscar Puente, ministro de Transportes e Mobilidade Sostible, viaxou de Madrid ata A Coruña nun tren Avril de alta velocidade en probas procedente de Madrid; primeiro parou en Ourense (tras dúas horas de viaxe) e subiu ao tren o alcalde de Ourense, Gonzalo Pérez Jácome; en Santiago subiu o presidente da Xunta, Alfonso Rueda, e a viaxe, que fixo acompañado desde Madrid coa alcaldesa coruñesa, Inés Rey, rematou na cidade herculina.
Puente partía as 7.30 horas da estación madrileña de Chamartín Clara Campoamor nun dos trens da serie S106 de Renfe que Talgo comezou a entregar a finais do mes pasado co nome comercial de Avril.
Puente chega hoxe a Galicia, en concreto á Coruña, nunha viaxe de simulación comercial dos novos S106, que circulan a alta velocidade por diferentes anchos de vía, adaptándose ás infraestruturas galegas, o que permitirá a chegada do AVE a cidades como Santiago, Vigo ou A Coruña a partir do próximo martes, día 21 de maio.
Durante o traxecto, o ministro conversou cos medios de comunicación, poñendo en valor a importancia dos novos Avril, cunha «altísima tecnoloxía» que lles permite mesmo operar con distintas tensións eléctricas. Óscar Puente destacou que, ao contar con máis de 500 asentos, multiplicarán por máis de dous o número de prazas dispoñibles entre Madrid e Galicia.
