Así o reflectiron mediante as súas chamadas ao 112 Galicia, nas que insistían en que nesa casa vivía unha muller.
Con estes datos, os xestores do Centro Integrado de Atención ás Emerxencias de Galicia puxeron en marcha os correspondentes protocolos para a mobilización dos seguintes recursos: Urxencias Sanitarias de Galicia-061, Bombeiros de Arteixo, Grupo Municipal de Emerxencias e Protección Civil. Tamén foron alertados os axentes da Policía Local e da Garda Civil.
Dirixíronse, entón, á Rúa da Beiramar, onde se producía este incendio, que revelou unha nova vítima mortal, e deixou danos irreparables, pois toda a vivenda resultou calcinada. De feito, os pisos lindeiros deberon ser desaloxados como medida de seguridade.
Unha vez que os Bombeiros de Arteixo lograron as condicións necesarias para acceder ao interior do piso, localizaron o corpo sen vida dunha muller. Ademais, observaron que o lume puido iniciarse na habitación e estendeuse ao baño e ao salón-comedor.
Un ferido en Boiro
Por outra banda, o 112 Galicia rexistrou esta mañá outro incendio nun piso en Boiro. Concretamente, produciuse na Rúa Pesqueira, e quen alertou a través do número único de emerxencias era o propio afectado. Explicou que era imposible saír. Impedíallo o intenso fume, que finalmente lle ocasionou unha intoxicación, pola que foi trasladado ao centro hospitalario de referencia.
Ademais das dúas habitación que resultaron calcinadas, toda a vivenda quedou afectada polo fume.
