O Concello de Tui presentou á Consellería de Promoción do Emprego da Xunta de Galicia a solicitude dun obradoiro de emprego cunha duración de doce meses e un investimento previsto superior aos 700 mil euros. O obxectivo deste obradoiro será a recuperación da Senda Río Miño Areeiro-Penedo e formaría a vinte persoas coma alumnado-traballador en dúas especialidades Forestal e Madeira.
De ser concedido o Concello de Tui aportaría 183 mil euros e a Xunta de Galicia 526 mil euros.
O alumnado traballador que participaría sería de 10 persoas en cada especialidade. No caso da de forestal, as persoas interesadas non necesitarían nivel formativo previo, mentres que para a especialidade de madeira necesitarían un nivel formativo de ESO. Ao remate do obradoiro recibirán o correspondente certificado de profesionalidade.
A actuación centrarase na mellora da accesibilidade da Senda PRG-19 (Tui-Caldelas-Tui), no tramo comprendido entre a Praia de Areeiros e Caldelas de Tui, até conectar co Sendeiro Municipal do río Miño entre o río Caselas en Tui e o Parque Municipal da Canuda.
A actuación prevista realizarase nun tramo de 6,535 metros á beira do Miño nas parroquias tudenses de Guillarei, Paramos, Baldráns e Caldelas de Tui, mellorando a accesibilidade e establecendo zonas de lecer e descanso, para poñer en valor a súa contorna e achegar á poboación os recursos paisaxísticos e patrimoniais que se atopan neste entorno coma é o caso do Petróglifo das Carneiras, a Ínsua de Mouros, o xacemento de Igrexa Vella, o local social de Augas Termais de Caldelas de Tui e o xacemento romano do Pombal.
A senda transcorre en boa parte por terreos de titularidade municipal e o concello traballa xa na solicitude dos permisos necesarios para a súa realización. No proxecto contémplase o seu acondicionamento baixo criterios de máxima integración ambiental e respecto á paisaxe e contorna. O ancho da senda será de 1,50 metros, cunha pendente transversal do 2% para evitar a formación de charcos e favorecer a drenaxe, adaptándose ao terreo natural minimizando os movementos de terra. Para salvar pendentes considerables contémplase a execución de pasarelas elevadas de madeira, e na zonas con desniveis superiores aos dous metros colocaranse varandas de madeira.
Co proxecto presentado a este obradoiro de emprego o concello de Tui mantén a súa posta pola recuperación das sendas fluviais, coma está a facer o actual obradoiro coa senda do río Furnia, xunto a recente execución das sendas entre a Mariña e a praia de Areeiros, coa pasarela peonil sobre o Louro, e coa actuación proxectada dende Caldelas até o límite con Salceda, no entorno do río Caselas coa CHMS.
Ao tempo o Concello de Tui mantén o seu compromiso coa formación e o emprego, xa que as persoas que participen neste obradoiro ao seu remate recibirán o certificado de profesionalidade en dúas especialidades que contan con gran demanda na actualidade.
Con estas e outras iniciativas formativas desenvolvidas ao longo dos últimos anos mellórase a empregabilidade das persoas en situación de desemprego, algo que queda reflectido nos positivos datos de descenso do número de persoas inscritas nas listas dos Servizos Públicos de Emprego, que suma cinco meses consecutivos de descenso.
