O Concello de Nigrán mantén a súa aposta pola cooperación internacional achegando este ano 10.000 € ao proxecto ‘Nadafa’ de recollida de residuos e sensibilización ambiental nos campamentos de refuxiados saharauis en Arxelia, concretamente na wilaya de Bojador con 16.500 habitantes. Asi o confirmou esta semana o alcalde, Juan González, ante Mohamed Mehdi, delegado da República Árabe Saharaui Democrática en Galicia; Ahmed Daula, responsable de cooperación internacional da Unión Nacional da Mocidade Saharaui; e Maite Isla, presidenta de SOGAPS, nun encontro coa Mancomunidade do Val Miñor no Concello de Nigrán, polo que tamén asistíu Policarpo Vilar, teniente de alcalde en Baiona. Estes cartos súmanse os 25.000 € que doara directamente o Fondo Galego e 25.000 € a Mancomunidade tamén para axuda alimentaria de emerxencia despois de que o rexedor nigranés, presidente tamén do Fondo, visitase xunto ao seu homólogo de Gondomar os campamentos en febreiro de 2022 e apreciasen in-situ estas necesidades.
«Nesta comarca temos un compromiso firme cos saharauis que se amosa cada ano no programa ‘Vacacións en Paz’ que, grazas ás familias acolledoras e á financiación dos concellos, trae a menores saharauis no verán”, explica González facendo tamén referencia aos 12 pequenos que chegarán o 17 de xullo ao Miñor. «O movemento solidario e a vontade expresada pola sociedade civil nesta causa é absoluto, o conflito do Sáhara compete directamente a España porque foi unha provincia máis deste país, e por iso queremos manter unha colaboración con eles, cremos que desde o local tamén debemos formar parte da cooperación internacional», insiste o rexedor, quen aprobou o ano pasado no Concello de Nigrán unha moción en defensa do dereito de autodeterminación do pobo saharaui e de rexeitamento da viraxe neste asunto de política exterior por parte do goberno de España, sendo o primeiro municipio de Galicia en facelo.
«Nadafa é un proxecto que repercute directamente na saúde dos saharauis e mellora as duras condicións de vida nos campamentos”, sinalou Daula, quen incidíu en que grazas a estes cartos por vez primeira na Historia dos campamentos existe un programa de sensibilización ambiental a cargo dunha ducia de persoas, repartindo folletos informativos entre as familias e cubos de recollida, ademais de construír puntos específicos para o depósito de lixo e ter contratadas a 20 mulleres e 2 condutores. Neste sentido, Daula, incidíu na importancia dun novo proxecto de recollida selectiva e reciclaxe de plásticos que o Fondo Galego vai a financiar, implicando neste traballo directamente á mocidade.
‘Nadafa’ significa “limpeza” en árabe e actúa en dúas vertentes. Dunha banda, mellorou o servizo de recollida de lixo sufragando a contratación de máis persoal e dotándoo dos materiais necesarios para realizar esta tarefa. Por outra parte, intensifica as actividades de sensibilización dirixidas á poboación, especialmente aos 3.382 nenos e nenas das escolas, contando con organizacións da zona como os colectivos xuvenís. Ao tempo, apoiase á emisora local para que reforce os contidos ambientais e as mensaxes a prol do coidado da contorna. O propio presidente do Fondo Galego de Cooperación e Solidariedade e alcalde de Nigrán, xunto ao de Gondomar, tiveron a oportunidade de comprobar in situ como a falta de recursos lles impide ás autoridades locais saharauís realizar unha correcta xestión dos residuos.
