Cristina Fernández Davila substitúe como deputada pola provincia de Pontevedra a Manuel Lourenzo Sobral, alcalde de Soutomaior.
Diego Lourenzo Moura, pola súa banda, será o novo parlamentario pola provincia de Ourense, posto no que releva a María González Albert, rexedora da Rúa tras os comicios celebrados o pasado 28 de maio.
Cristina Fernández Davila é técnica especialista en Informática de Xestión, e chega ao Pazo do Hórreo despois dunha dilatada traxectoria na política municipal. No 2012 foi elixida concelleira do BNG no Concello de Ponteareas, onde no 2015 asumiu a segunda tenencia de alcaldía e a concellaría de Ensino, Participación Cidadá e Réxime Interior. Logo das eleccións de maio de 2019, fíxose cargo da primeira tenencia de alcaldía, así como das concellarías de Ensino, Eventos, Saúde e Consumo. Foi alcaldesa de Ponteareas entre 2021 e 2023.
Diego Lourenzo Moura é técnico superior de Administración e Finanzas. Chega tamén ao Parlamento galego dende a política municipal, tras desenvolver a súa actividade como concelleiro do BNG en Verín entre os anos 2011 e 2015. Nos comicios de 2015 foi cabeza de lista neste concello e formou no goberno municipal como primeiro tenente de alcalde e portavoz do Goberno do Concello, cargos que revalidou nas citas electorais de 2019 e 2023.
