O ano pasado colocáronse 400 e este 2023 outras tantas. Trátase dunha campaña municipal de colaboración entre Concello e apicultores locais
O merendeiro de Santa Mariña, na parroquia de Pereiras, acolleu a entrega por parte do Concello de 400 trampas para vespas velutinas, adquiridos con fondos propios, como parte da campaña anual de prevención contra a velutina que desde fai anos vénse desenvolvendo por parte da administración local. A idea é ir ano tras ano sumando trampas para facer unha rede e ser máis efectivos no trampeo das raíñas nesta época.
Na entrega estiveron presentes a alcaldesa de Mos, Nidia Arévalo; o concelleiro de Medio Ambiente Sostible, Leo Costas; o coordinador dos apicultores de Mos, Serafín Arjones, e representantes do Grupo de Emerxencias Supramunicipal (GES) de Mos.
O obxectivo desta campaña é dotar aos apicultores mosenses, que durante o verán axudan ao Servizo Municipal de Emerxencias de Mos a eliminar niños de velutina, dun reforzo na loita contra esta especie invasora, baseado en medidas de prevención.
A instalación das trampas farase nas 10 parroquias por igual, a razón de 40 trampas por parroquia, e realizarana entre máis dunha vintena de apicultores mosenses que participan nesta iniciativa e que, tras a colocación das trampas, encargaranse de vixilalas para que se conserven en bo estado e controlar que conteñen a cantidade necesaria de líquido atraente, ou repoñelo en caso contrario.
A instalación das trampas comezará xa e realizarase durante o que queda do presente mes de febreiro, que é cando saen as raíñas que ata o de agora atopábanse hibernando.
Desde o Concello de Mos infórmase de que a campaña de trampas repítese cada ano. O pasado 2022 xa se repartiron e instalaron outras 400 unidades. Dado que cada trampa dura varios anos, deste xeito lógrase que este ano cada parroquia mosense conte xa con 80 trampas instaladas; un total de 800 en todo Mos. Así mesmo, os representantes municipais, Arévalo e Costas, avanzaron que o próximo verán farase a entrega a estes máis de 20 apicultores mosenses o veleno para disparar e desactivar os niños de velutina nas dúas modalidades existentes: pértiga e escopeta.
O edil de Medio Ambiente Sostible, Leo Costas, declaraba esta tarde que “na prevención está a clave para poder ter un verán e un outono libre de velutinas, polo que desde o Concello de Mos, ademais de investir nesta campaña de trampas profesionais, anímase aos particulares a elaborar trampas caseiras que poden colocar nas súas fincas”. Para ensinar como construír estas trampas caseiras publicarase un vídeo didáctico nas redes sociais municipais. Costas destacou para rematar que “a pesares de non ter competencias nesta materia, desde o Concello de Mos implicámonos fortemente na prevención e eliminación da vespa velutina, coñecedores da importancia que teñen campañas deste tipo e da preocupación que esta especie invasora xera non só entre o colectivo dos apicultores, senón entre a veciñanza en xeral”.
