A alcaldesa e a edil de Política Social de Mos visitaron as instalacións nas que se fixeron traballos de mantemento e mellora financiados polo Consorcio Galego de Servizos de Igualdade e Benestar e polo propio Concello
A alcaldesa de Mos, Nidia Arévalo, e a concelleira de Política Social e Igualdade, Sara Cebreiro, visitaron esta mañá das tres escolas infantís A Galiña Azul de Mos, Veigadaña, Cototorrón e Porteliña, para supervisar que todo estivese a punto de cara á celebración da xornada de portas abertas o vindeiro luns, 5 de setembro, e o inicio do curso o martes día 6.
As tres escolas foron obxecto de melloras durante o verán de cara a este novo curso 2022-2023. Melloras realizadas polo Consorcio Galego de Servizos de Igualdade e Benestar e polo propio Concello.
Durante o pasado mes de agosto, tempo no que as instalacións estiveron pechadas por vacacións, aproveitouse para realizar traballos de mantemento e mellora. Nas tres escolas realizouse unha importante inversión nos exteriores e zonas axardinadas, que ascende a un total de 24.000 euros.
Estas obras de optimización exterior consistiron na substitución do caucho por céspede na Escola Infantil de Cotororrón, e na plantación de árbores, céspede e plantas no xardín e adquisición de novos módulos de xogo infantil para o parque na Escola Infantil da Porteliña. Na Escola Infantil da Veigadaña acometerase a vindeira semana o peche perimetral con valado no exterior axardinado, instalación realizada a demanda dos pais/nais.
Por outra banda, nos interiores, realizáronse labores de pintado de paredes en todas as escolas e, nalgunhas, renovación de billas, posta a punto da carpintería interior e renovación de mobiliario.
Agora mesmo hai 60 nenos/as matriculados na Escola Infantil da Veigadaña, 32 en Cotorrón e 28 en Porteliña. En total comezarán o curso a vindeira semana 120 cativos/as.
