O bebé morreu e a súa irmá está ingresada por síntomas de desnutrición tamén no hospital de Santiago.
O subdelegado do Goberno, José Miñones:
A irmá do bebé falecido este xoves en Lalín con síntomas de desnutrición permanece ingresada no Complexo Hospitalario Universitario de Santiago (CHUS), dado que o seu estado era «desde logo mellor, pero tampouco o máis idónea posible».
Así o confirmou este venres en declaracións aos medios o delegado do Goberno en Galicia, José Miñones, quen lamentou o falecemento do neno, que chegou nunha situación «moi crítica» á PAC de Lalín e morreu a pesar das manobras de reanimación e do traslado até Santiago en ambulancia.
«Ante a evidencia do que nos trasladaron os médicos, presentaba signos de desnutrición e por tanto o que fixemos foi abrir unha investigación», da que se encarga a Policía Xudicial da Garda Civil de Lalín.
Miñones destacou que agora «principalmente» están pendentes da autopsia «que se vai a realizar no día de hoxe». E é que, tal e como trasladan fontes do Instituto Armado, será o informe do forense o que determine a causa da morte e, a partir de aí, dirimir se podería existir algunha responsabilidade por parte dos pais.
O delegado do Goberno, que desexa a «recuperación» da segunda filla -duns dous anos- desta parella de cidadáns búlgaros, avanza tamén que «agora mesmo o caso vai quedar en mans da Fiscalía de Menores».
Por parte da Xunta, fontes da Consellería de Política Social e Xuventude trasladan a Europa Press que están «moi pendentes» deste suceso que xa está xudicializado e que están «en coordinación» cos servizos sociais do Concello de Lalín. Precisamente, desde o Consistorio aseguraban o xoves que xa tiñan constancia da delicada situación desta familia.
Todo ocorreu na noite do mércores, despois de que o 061-Urxencias Sanitarias recibise a primeira alerta da morte do bebé sobre as 23.15 horas da noite. Este servizo mobilizou unha ambulancia medicalizada da PAC de Lalín, que se encargou do traslado do neno ao CHUS.
Durante o traxecto, os profesionais tentaron reanimalo sen éxito, polo que unha vez chegou ao hospital da capital galega, minutos antes da medianoite, só puideron confirmar a súa morte. Desde entón, a outra filla da parella permanece ingresada.
