Foi un particular o que deu a voz de alarma e iniciouse unha persecución
A Policía Local de Mos logrou esclarecer a autoría de varios roubos de combustible en camións que se estaban producindo nos últimos días no municipio coa detención de dúas persoas.
Tralo aviso dun particular afectado por estes furtos o pasado sábado, a Policía Local solicitou o apoio da Garda Civil para seguir ao vehículo ocupado polos sospeitosos, que se deron á fuga. Para impedir a súa marcha, alertaron á Policía Local dos municipios limítrofes de Redondela e Porriño, ao ser as dúas únicas vías de escape posibles.
Finalmente, o vehículo foi detectado pola Policía Local de Mos na N-550, escondido tras un camión, aínda que volveu a emprender a marcha, esta vez sen éxito grazas á acción conxunta das patrullas da Policía Local de Mos e Porriño e da Garda Civil.
Durante a detención, os axentes comprobaron que o vehículo era roubado e fora “ponteado”. Ademais, tanto no asento traseiro como no maleteiro encontraron garrafas e ferramentas destinadas ao roubo de gasóleo.
Así mesmo, a Policía Local contaba coa declaración dun veciño que a noite anterior fora testemuña dos feitos e sacara fotos de como estas dúas persoas subtraían o gasóleo dun camión estacionado próximo á súa vivenda
