Prudencia e responsabilidade ante os riscos de ter que dar marcha atrás na desescalada. O presidente da Xunta, Alberto Núñez Feijóo, fixo este venres un chamamento á prudencia no inicio dunha nova fase de desescalada en Galicia «non exenta de riscos» e pide «responsabilidade individual e colectiva».
Con respecto á Semana Santa, o presidente galego sinalou que «se seguimos controlando a incidencia, a sete días vai moi ben, teremos máis posibilidades de recibir» a turistas e se non, recoñeceu, pois haberá «menos posibilidades». En calquera caso insistiu en que un mes é moito tempo, polo que haberá que ir vendo a evolución.
Nun acto en Santiago, Feijóo manifestou este venres que espera que, a partir do próximo luns 1 de marzo, o Goberno central «cumpra a súa promesa» e Galicia empece a recibir o 8,2% de vacinas «que lle corresponden», tendo en conta que ten ese mesma porcentaxe de maiores de 80 anos, colectivo ‘diana’ neste momento para a administración de dose fronte á covid-19.
Respecto ás manifestacións do 8M, o conselleiro de Sanidade, Xullo García Comesaña, recomendou «pospor» a participación nas marchas feministas convocadas polo 8 de marzo ou facelas «doutra forma», dada a situación epidemiolóxica pola pandemia de coronavirus.
Preguntado respecto diso este venres nun acto en Santiago, o titular de Sanidade expuxo que «en xeral» di «que non» cando se lle pregunta sobre a posibilidade de «concentrarse» ou acudir a un lugar con «moita xente». «Entre ir a un evento con moita xente ou non ir ou facelo doutra forma», apuntou, o seu consello sería «pospolo e facelo noutro momento».
